Pazhampori Recipe Kerala Style : കേരളത്തിലെ നാലുമണി പലഹാരങ്ങളിൽ ഏറ്റവും പ്രിയപ്പെട്ട ഒന്നാണ് പഴംപൊരി. ചൂട് ചായക്കൊപ്പം ഒരു പ്ലേറ്റ് പഴംപൊരി കിട്ടിയാൽ മതി, വൈകുന്നേരം തന്നെ കൂടുതൽ രുചികരമാകും. പണ്ടുകാലം മുതൽ തന്നെ നമ്മുടെ നാട്ടിലെ വീടുകളിൽ നേന്ത്രപ്പഴം സുലഭമായി ലഭിച്ചിരുന്നുവല്ലോ. അതിനാൽ പഴുത്ത നേന്ത്രപ്പഴം കേടാകാതെ ഉപയോഗിക്കാനുള്ള മികച്ച മാർഗമായി പഴംപൊരി മാറി. കുട്ടികൾക്ക് നേരിട്ട് പഴം കൊടുത്താൽ പലപ്പോഴും കഴിക്കാൻ മടി കാണിച്ചാലും, പഴംപൊരിയായി നൽകിയാൽ അവർ സന്തോഷത്തോടെ കഴിക്കും. ഇന്നും വീടുകളിലും ചായക്കടകളിലും ഒരുപോലെ ഡിമാൻഡുള്ള പലഹാരമാണിത്. പക്ഷേ വീട്ടിൽ തയ്യാറാക്കുമ്പോൾ കടയിൽ നിന്ന് കിട്ടുന്ന അത്ര സോഫ്റ്റ്നസ്സും രുചിയും ലഭിക്കുന്നില്ലെന്നാണ് പലരുടെയും പരാതി.
രുചികരമായ പഴംപൊരിയുടെ തുടക്കം നല്ല പഴം തിരഞ്ഞെടുക്കുന്നതിലാണ്. നന്നായി പഴുത്ത നേന്ത്രപ്പഴം ഉപയോഗിക്കുമ്പോഴാണ് പഴംപൊരിക്ക് സ്വാഭാവിക മധുരവും സോഫ്റ്റ് ടെക്സ്ചറും ലഭിക്കുക. പഴം തോൽ കളഞ്ഞ ശേഷം ഒട്ടും കട്ടിയില്ലാത്ത സ്ലൈസുകളായി മുറിച്ച് വയ്ക്കണം. പഴുക്കാത്ത പഴം ഉപയോഗിച്ചാൽ പഴംപൊരിക്ക് ചെറിയ കറ ഫീൽ ഉണ്ടാകുകയും രുചി കുറയുകയും ചെയ്യും. അതിനാൽ പഴത്തിന്റെ തിരഞ്ഞെടുപ്പിൽ പ്രത്യേക ശ്രദ്ധ വേണം. ശരിയായ കട്ടിയിൽ മുറിച്ചെടുക്കുന്നതും പ്രധാനമാണ്. വളരെ കട്ടിയുള്ള കഷണങ്ങളാക്കിയാൽ അകത്ത് ശരിയായി വേവാതെ പോകാം. അതുകൊണ്ട് നീളത്തിൽ ഒതുക്കമുള്ള സ്ലൈസുകളാക്കുന്നതാണ് നല്ലത്.
ഒരു പാത്രത്തിലേക്ക് മൈദ, അരിപ്പൊടി, മഞ്ഞൾപ്പൊടി, പഞ്ചസാര, ആവശ്യത്തിന് ഉപ്പ് എന്നിവ ചേർത്ത് ആദ്യം നന്നായി മിക്സ് ചെയ്യുക. ശേഷം വെള്ളം കുറേശ്ശെയായി ചേർത്ത് കട്ടകളില്ലാത്ത മൃദുവായ ബാറ്റർ തയ്യാറാക്കണം. മഞ്ഞൾപ്പൊടിയോ ഫുഡ് കളറോ ചേർക്കുന്നത് പഴംപൊരിക്ക് നല്ല നിറം ലഭിക്കാൻ സഹായിക്കും. അതേസമയം അരിപ്പൊടി ചേർക്കുന്നത് പുറംഭാഗം നല്ല ക്രിസ്പിയാക്കും. പലരും സോഫ്റ്റ്നസ്സിനായി ബേക്കിംഗ് സോഡ ഉപയോഗിക്കാറുണ്ടെങ്കിലും, ദോശമാവ് ചേർക്കുന്നത് കൂടുതൽ നല്ല ഫലം നൽകും. ഇത് ബാറ്ററിലേക്ക് ചേർത്ത ശേഷം കുറഞ്ഞത് അഞ്ച് മണിക്കൂർ റെസ്റ്റ് ചെയ്യാൻ വയ്ക്കണം. സമയം കുറവാണെങ്കിൽ അരമണിക്കൂറെങ്കിലും റെസ്റ്റ് നൽകുന്നത് നല്ലതാണ്. ഈ ചെറിയ ടിപ്പാണ് പഴംപൊരിയുടെ സോഫ്റ്റ്നസ് കൂട്ടുന്നത്.
ബാറ്റർ റെഡിയായ ശേഷം ഒരു ചീനച്ചട്ടിയിൽ ആവശ്യത്തിന് എണ്ണ ഒഴിച്ച് ചൂടാക്കുക. എണ്ണ നന്നായി ചൂടായാൽ ഓരോ പഴക്കഷണവും ബാറ്ററിൽ മുക്കി എണ്ണയിലേക്ക് ഇടുക. മീഡിയം തീയിൽ ഇരുവശവും ഗോൾഡൻ നിറമാകുന്നതുവരെ പൊരിച്ചെടുക്കണം. അങ്ങനെ ചെയ്താൽ പുറത്ത് ക്രിസ്പിയും അകത്ത് സോഫ്റ്റുമായ പഴംപൊരി ലഭിക്കും. ചൂടോടെ ചായക്കൊപ്പം സർവ് ചെയ്യുമ്പോഴാണ് അതിന്റെ യഥാർത്ഥ രുചി അറിയാൻ കഴിയുക. വേണമെങ്കിൽ ബീഫ് പോലുള്ള സൈഡ് ഡിഷിനൊപ്പവും വിളമ്പാം. ഒരിക്കൽ ഈ രീതിയിൽ തയ്യാറാക്കി നോക്കിയാൽ കടയിൽ നിന്ന് വാങ്ങുന്ന അതേ രുചിയും സോഫ്റ്റ്നസ്സും വീട്ടിൽ തന്നെ അനുഭവിക്കാം. Pazhampori Recipe Kerala Style credit :Deena Afsal (cooking with me)